Pigilan ang pagkakaroon ng rabies pagkatapos makagat, makalmot, o malantad sa hayop

Alamin kung aling mga hayop ang puwedeng magpasa ng rabies sa mga tao

Sa San Francisco, lahat ng kaso ng animal rabies mula noong dekada '40 ay nangyari sa mga paniki.

Sa USA, karamihan sa mga kaso ng rabies sa mga hayop ay nangyayari sa mga ligaw na raccoon, skunk, fox, at paniki. Puwede ring magpasa ng rabies ang mga coyote at opossum. Ang mga alagang hayop tulad ng mga aso, pusa, at baka ay puwedeng mahawaan ng rabies, pero bihira lang ito. Ang alagang aso, pusa, o ferret na ipinanganak sa USA at may mga napapanahong bakuna sa rabies ayon sa dokumentasyon ay may napakaliit na tsansang may rabies.

Sa USA, ang rabies ay hindi naipapasa sa mga tao ng maliliit na rodent tulad ng mga gopher, squirrel, bubuwit, daga, gerbil, hamster, o guinea pig.

Sa mga umuunlad na bansa, kasama ang kalakhan ng Asia, Africa, at Latin America, may dalang rabies ang mga alaga at ligaw na hayop. Sa mga bansang ito, posibleng makakuha ng rabies ang mga tao mula sa mga aso.
 

Alamin kung kailangan mo ng mga rabies shot pagkatapos makagat ng aso o pusa

Depende. Matutukoy ba ang kalusugan ng hayop 10 araw pagkatapos nitong makakagat? Walang rabies ang mga aso, pusa, at ferret na malusog pa rin 10 araw pagkatapos makakagat. Kaya hindi kailangang magpabakuna ang nakagat para sa rabies.

Kung hindi matukoy ang kalusugan ng hayop sa ika-10 araw (halimbawa, ligaw ito na nakatakas):

• Kung nakatira sa San Francisco ang hayop, napakaliit ng posibilidad na may rabies ito. Kaya hindi namin lubos na inirerekomenda ang magpabakuna. Pero dahil mayroon pa ring maliit na tsansang may rabies, inirerekomenda naming pagpasyahan ninyo ng iyong doktor ang tungkol sa pagpapabakuna.
• Kung hindi sa San Francisco nakatira ang hayop, isasaalang-alang namin ang posibilidad ng rabies sa lugar kung saan nakatira ang hayop. Pagkatapos ay magbibigay kami ng rekomendasyon. Kung nakagat ka ng aso, pusa, o ferret sa labas ng USA, kadalasan ay nagbibigay kami ng matinding rekomendasyon na magpabakuna laban sa rabies.
   

Alamin pa ang tungkol sa regimen ng pagpapabakuna laban sa rabies

Kasama sa regimen ang 1 dosis ng Human Rabies Immune Globulin (HRIG) at 4 na dosis ng bakuna sa rabies para sa karamihan ng mga tao. Dapat kang kumuha ng HRIG at unang dosis ng bakuna sa doktor sa lalong madaling panahon pagkatapos malantad. Pagkatapos, kukuha ka ng higit pang dosis ng bakuna sa ika-3, ika-7, at ika-14 na araw pagkatapos ng unang dosis ng bakuna. Kung immunosuppressed ka, kukuha ka ng ikalimang dosis sa ika-28 araw pagkatapos ng unang dosis ng bakuna.

Ang kumbinasyon ng paggamot sa sugat, HRIG, at pagbabakuna ay 100% epektibo sa pag-iwas sa rabies sa tao. Wala pang nagkakaroon ng rabies pagkatapos gawin ang mga hakbang na ito nang agaran at tama pagkatapos malantad.
 

Alamin kung saan dapat kumumpleto ng regimen ng mga bakuna laban sa rabies na inumpisahan sa labas ng SF

Pumunta sa emergency department ng ospital na nasa network ng iyong insurance. Kung hindi mo iyon magagawa, magpa-appointment sa AITC.
 

Alamin kung paano iwasang malantad sa rabies

Iwasan ang contact sa mga ligaw na hayop.

Lagyan ng screen ang lahat ng bintana at gumamit ng mga chimney cap. Maglagay ng mga draft-guard sa ilalim ng mga pinto sa mga attic. Siguraduhing nakasara nang mabuti ang lahat ng pintuang papunta sa labas. Huwag iwanang bukas ang mga pintuan o bintanang walang screen, lalo na kung natutulog ang mga tao.

Lumikas sa anumang silid na may buhay na paniki at isara ang pinto. Tumawag agad sa Pamamahala at Pag-aalaga ng mga Hayop sa (415) 554-9400 kung may paniki sa loob ng inyong bahay o lugar ng trabaho, o kung may makikita kang may sakit o patay na paniki sa labas ng bahay ninyo. Huwag hawakan ang mga paniki kahit na sa tingin mo ay may sakit o patay na sila.

Panatilihing napapanahon ang mga bakuna sa rabies ng iyong mga alagang hayop.